Вăрмар поселокĕнчи Культурăпа кану паркĕнче паллă экологи пуçарăвне старт панă. Обществăлла хутлăха хăтлăлатас тĕлĕшпе тата Пĕтĕм Раççейри «Раççей чечекĕсем» акци шайĕнче чечексем лартассипе ĕçсем пуçланнă. Чĕрĕ чечексем парка илемлетеççĕ, ăна ешĕллетме тата тăван поселока хăтлăлатма пулăшаççĕ.
Амăшĕпе ачине халалланă палăк территорине уйрăмах пысăк тимлĕх уйăрнă. Ку вăл çемье хаклăхĕсене тата ăрусем хушшинчи çыхăнăва палăртакан паллă вырăн.
Пурте пĕрле тăрăшнипе паркăн çак кĕтесĕ капăрланнă, кунта тирпейлĕ клумбăсем йĕркеленĕ, монумент территорийĕ куçа савăнтарать.
Ырă ĕçе пурнăçлама волонтерсем пулăшнă, çутçанталăкшăн тата тăван тăрăхшăн тăрăшасси вĕсемшĕн малти вырăнта. Вĕсем хутшăннипе «Пурнăç инфратытăмĕ» наци проекчĕн тĕллевĕсем пурнăçланаççĕ, мĕншĕн тесен тăван тавралăха юратни эпир пурăнакан вырăна тасарах, ешĕлрех, хăтлăрах тума пулăшакан пĕчĕк, анчах çав тери пĕлтерĕшлĕ ĕçсенчен пуçланать.
